टीकापुर, ९ जेठ/निर्वाचन अधिकृतको कार्यालयले टीकापुर नगरपालिकाका नवनिर्वाचित पदाधिकारीलाई प्रमाणपत्र वितरण गरेको छ ।
टीकापुर नगरपालिकामा एक कार्यक्रम गरी नव निर्वाचित पदाधिकारीलाई निर्वाचित भएको प्रमाणपत्र प्रदान गरिएको हो । प्रमाणपत्र वितरण गर्दै निर्वाचन अधिकृतको कार्यालय टीकापुरका निर्वाचन अधिकृत पुष्कर खड्काले टीकापुरबासीका आशा, घोषणापत्र मा उल्लेख गरिएका प्रतिवद्धता पालना गर्न सुझाव दिनुभयो ।
खड्काले निर्वाचन सम्पन्न गराउन सघाउने सबैलाइ धन्यवाद दिँदै टीकापुरबासीले मतदान गरेको सम्झेर टीकापुरको विकास र हितमा काम गर्न सल्लाह दिनुभयो ।
कार्यक्रममा बोल्दै टीकापुर नगरपालिकाका प्रमुख प्रशासकीय अधिकृत मंगलबहादुर शाहीले विश्वास र सफलता निरन्तर चलिरहोस् भन्दै पदअनुसार दायित्व निर्वाह गर्न अनुरोध गर्नुभयो ।
कार्यक्रममा ईलाका प्रहरी कार्यालय टीकापुरका प्रहरी नायव उपरीक्षक हेमबहादुर शाहीले शान्ति सुरक्षा स्थापना गर्न जनप्रतिनिधिको सहयोग आवश्यक रहेको बताउनुभयो ।
कार्यक्रम सहायक निर्वाचन अधिकृत लक्ष्मी ओडले सञ्चालन गर्नुभएको थियो ।