टीकापुर, १० कात्तिक/टीकापुर नगरपालिका–५ स्थित कर्णाली नदीको तटमा रहेको टीकापुर बृहत् उद्यानमा तीनदिनमा पर्यटक प्रवेश शुल्कबाट रु नौं लाख ३५ हजार राजश्व सङ्कलन भएको छ ।
दसैँ र तिहारपछि उद्यानमा आन्तरिक पर्यटक बढेका छन् । टीकापुर उद्यानमा शुक्रबार तीन हजार ७००, शनिबार छ हजार ५०० र आइतबार छ हजार ३०० पर्यटक भित्रिएका छन् । आइतबार पर्यटकको प्रवेश शुल्कबाट रु तीन लाख ६५ हजार, शनिबार रू तीन लाख ८५ हजार र शुक्रबार रु एक लाख ८५ हजार राजश्व सङ्कलन भएको पार्क इन्चार्ज अर्जुन कुँवरले जानकारी दिनुभयो ।
बृहत् उद्यान तथा टीकापुर पार्कमा आउने कतिपय पार्कमै पिकनिक खाने र रमाउने गर्दछन्, भने कतिपय घुमघाम गर्ने, नदी किनारमा रहेको मोटरबोटमा सवार गरेर फर्कने गरेका छन् । पार्कमा फोटो खिच्ने र टिकटक बनाउनेको भीड लाग्न थालेको छ ।
कालिकोटको रास्कोटका ज्येष्ठ नागरिक कृष्णप्रसाद न्यौपाने टीकापुर आएका बेला पार्क पुग्नुभयो । उहाँलाई पार्क असाध्यै मनपर्यो । “तिहार मनाउन टीकापुर आएको थिएँ, उद्यान राम्रो छ,घुमेर जानुस् भनेर आफन्तले भनेपछि घुम्न आएको हुँ”, न्यौपानेले भन्नुभयो, “पार्क असाध्यै सुन्दर रहेछ, यहाँ आएपछि आनन्द महसुस भयो, स्वर्गीय राजा वीरेन्द्र र रानी ऐश्वर्यको सम्झनाका ऐतिहासिक भवन रहेछन् ।”
कपिलवस्तुबाट समूहमा पार्क घुम्न आउनुभएका ध्रुव पन्थी पहिलो पटक टीकापुर उद्यान घुम्न पुग्नुभयो । चिसापानी, महाकाली पछि पार्क पुगेका उहाँलाई पुराना बिरुवा, माटोले बनेका सडक सुन्दर, कर्णाली नदीको तट असाध्यै सुन्दर लाग्यो । “इतिहास बोकेको पार्क हेरौँ भनेर आएका हौँ, राम्रो लाग्यो, कर्णाली नदी किनारमा पनि राम्रो पार्क बनाइएको रहेछ”, उहाँले भन्नुभयो, “पार्क घुमेपछि कर्णाली नदीमा मोटरबोटमा रमाउन पाइयो ।”
पार्क आउनेहरू अधिकांश फोटो खिच्ने र टिकटक बनाउने गर्दछन् । लम्कीचुहाको कौवापुरकी धनसरा विष्टको समूहले पनि पार्कमा रमाइलो गरेको छ । “पार्कमै पकाएर, नाचगान गर्दै खायौँ”, उहाँले भन्नुभयो, “देउसीभैलो खेलेर दर्जनौँ समूह पिकनिक खान आएका छन् ।”
तिहारपछि देउसीभैलो खेलेर पिकनिक खान आउनेको पनि पार्कमा भीड लागेको छ । पार्कमा दैनिक हजारौँ पर्यटक आउन थालेपछि नगरपालिका व्यवस्थापन मा जुटेको छ । तिहारपछि पार्कमा पर्यटक बढ्ने समयमा नगरपालिकाले पार्कमा कर्मचारी व्यवस्थापन,सुरक्षाकर्मी व्यवस्थापन र पर्यटकको सहजताका लागि काम गरिरहेको प्रशासकीय अधिकृत देवीप्रसाद आचार्य बताउनुहुन्छ ।
“पालिकाले सहज प्रवेशका लागि टिकट काट्न तीन काउन्टर सञ्चालन र नगर प्रहरी परिचालन गरेको छ”, उहाँले भन्नुभयो, “यसका साथै शान्ति सुरक्षाका लागि प्रहरी को सहयोग लिएका छौँ, केही दिनका लागि पार्कमा कर्मचारी र सरसफाइकर्मी थप गरिएको छ ।”