टीकापुर, १३ माघ/टीकापुर सामुदायिक पुस्तकालयले प्र्रत्येक महिना उपलव्ध गराउने उत्कृष्ट पाठकमा टीकापुर १ ब्लक नम्बर १४ कि सीमा कठरिया पर्नुभएको छ ।
पौष महिनाको उत्कृष्ट पाठक पुरस्कार सरस्वति पूजाको दिन बिहीवार पुस्तकालयका पूर्व अध्यक्ष एवम् वीरेन्द्र विद्या मन्दिर उच्चमाविका पूर्व प्राचार्य धनञ्जय तिमिल्सेनाले एक कार्यक्रमका बीच उत्कृष्ट पाठक कठरियालाई प्रदान गर्नुभएको हो ।
पुरस्कार वितरण पछि पूर्व प्राचार्य तिमिल्सेनाले पढ्ने संस्कृति घटदै गएको बेला सरोकार समूहले पाठकमा अध्ययनतर्फ रुचि बढाउन यो पुरस्कार व्यवस्था गरिएको भन्दै सन्तोष प्रकट गर्नुभयो । उहाँले पुस्तकालय मा अध्ययन गर्न आउने वातावरण बनाउन थप नयाँ कार्यक्रम ल्याउनुपर्नेमा जोड दिनुभयो ।
उत्कृष्ट पाठक कठरियालाई १० हजार नगद र प्रमाणपत्र प्रदान गरिएको छ । यसपटकको पुरस्कारको सौजन्य हाल दक्षिण कोरियामा कार्यरत समूहका सदस्य रेवन्त रावलले उपलव्ध गराउनुभएको हो ।
प्रत्येक महिना प्रदान गरिने उत्कृष्ट पाठक पुरस्कार टीकापुर सरोकार समूहले टीकापुर सामुदायिक पुस्तकालयको व्यवस्थापन र मूल्याकंन सहयोग मा गत महिनादेखि प्रदान गर्दै आएको छ ।
मंसिर महिनाको उत्कृष्ट पाठक टीकापुरस्थित बहुप्राविधिक शिक्षालयका उपेन्द्र चौधरीलाई प्रदान गरिएको थियो । सरोकार समूहले परीक्षणका लागि भनेर एक वर्षका लागि पठन संस्कृति बढाउन यो पुरस्कारको व्यबस्था गरेको हो । पुरस्कारको व्यबस्था गरिएपछि पुस्तकालयमा अध्ययन गर्न आउनेको संख्या बढेको बताइन्छ ।