नेपाली कांग्रेसका उम्मेदवार जनकराज चौधरीद्वारा नौ बुंदे प्रतिवद्धता प्रस्तुत (पूर्णपाठ)

टीकापुर, ४ फागुन\नेपाली काँग्रेस प्रतिनिधिसभा कैलाली क्षेत्र नम्बर १ का उम्मेदवार जनकराज चौधरीले चुनावी सङ्कल्प सार्वजनिक गर्नु भएको छ ।

आइतबार टीकापुरमा पत्रकार सम्मेलन गर्दे चौधरीले आफू विजयी भएमा शिक्षा, स्वास्थ्य, कृषि, युवालाई रोजगारी, पर्यटन, पूर्वाधार विकास, वातावरण संरक्षण र सुशासन कायम गर्ने लगायतका नौ बुँदा सार्वजनिक गर्नु भएको छ । ‘बदलियो काँगे्रस, बदल्छौंं देश’ भन्ने सङ्कल्पका साथ मतदाताप्रतिको दायित्व पूरा गर्न  आफ्नै निर्वाचन क्षेत्रमा साँस्कृतिक एकाडेमी, स्पोर्टस एकाडेमी स्थापना गर्ने, हरेक वर्ष एक सय युवालाई सहकारी र उद्यमशीलताका विकास गर्न ‘सिड मनी’ दिने, सांसद छात्रवृति कोषको स्थापना गरी गरिब, थारु, दलित, महिला तथा सिमान्तकृत विद्यार्थीलाई दिइने, प्रारम्भिक तहमा थारु भाषामा आधारित शिक्षा प्रदान गर्ने चौधरीले बताउनु भएको छ ।

चौधरीको सङ्कल्प पत्रमा टीकापुरमा सुख्खा बन्दरगाह निर्माणमा विशेष जोड दिने, व्यवस्थित बस्तीलाई योजनावद्ध बस्तीमा विकास गर्ने उल्लेख   छ । टीकापुरमा करीब पाँच हजारको सङ्ख्यामा भूमिहिन सुकुम्वासी मुक्तकमैंया विभिन्न शिक्षालयका जग्गामा बसिरहेका छन् । यस्तै सुदूरपश्चिम प्रदेश सरकारले स्थापना गर्न लागेको टीकापुर प्राविधिक विश्वविद्यालय स्थापनाका लागि भूमिको व्यवस्था गर्ने पनि चौधरीको सङ्कल्प पत्रमा उल्लेख छ । कर्णाली कोरिडोर, सेती  राजमार्ग, टीकापुर अस्पताललाई १०० शैयाको बनाउने यहाँ खुलेका प्राविधिक शिक्षालयको स्तवृद्धिका लागि ठोस कार्यक्रम ल्याउने प्रतिवद्धता पनि उल्लेख छ ।

२०७० सालमा फोरम लोकतान्त्रिक पार्टीबाट यही क्षेत्रमा संविधान सभा सदस्य निर्वाचित हुनु भएका चौधरी हाल नेपाली काँगे्रस सुदूरपश्चिम प्रदेश कार्य समितिका उपसभापति हुनुहुन्छ । अघिल्लो निर्वाचनमा संविधान बनाउन व्यस्त भएको बताउनु भएका चौधरीले यसपटक विजयी भए शिक्षा, स्वास्थ्य, कृषि, युवालाई रोजगारी, पर्यटन, थारु सँस्कृतिको विकास गर्ने यस क्षेत्रका लागि सडक सिचाईका क्षेत्रमा काम गर्ने बताउनु भएको छ । चौधरी २०७० को संविधान सभा सदस्य निर्वाचित भइ संसदको वन वातावरण समितिको सभापति र स्थानीय विकास राज्यमन्त्री हुनुभएको थियो ।

(पूर्णपाठ)